नेपाली कांग्रेस चितवनको अधिवेशन आजदेखि सुरु, पहिलो दिन उम्मेद्वारी मनोनयन दर्ता


शेयर गर्नुहोस्

चितवन, १९ फागुन । नेपाल कांग्रेस चितवनको जिल्ला अधिवेशन आज (बिहीबार)देखि सुरु हुँदैछ । नारायणगढस्थित नारायणी कला मन्दिरमा अधिवेशन शुरु हुन लागेको हो ।

दुई दिनसम्म चल्ने अधिवेशनको पहिलो दिन आज निर्वाचन प्रक्रिया सुरु हुनेछ । निर्वाचन तालिका अनुसार बिहीबार बिहान ७ बजे मतदाता नामावली प्रकाशन गरिने छ । बिहान ८ देखि दिउँसो १ बजेसम्म उम्मेदवार मनोनयन दर्ताको कार्य चल्ने छ । दिउँसो १ः३० बजे उम्मेदवारको प्रथम नामावली प्रकाशन, १ः३० बजेदेखि २ बजेसम्म दावी विरोध, २ः१५ बजे दावी विरोध पश्चात उम्मेदवारहरुको दोस्रो नामावली र २ः१५ देखि ३ः३० बजेसम्म उम्मेदवारलाई नाम फिर्ता लिने समय दिइएको छ ।

दिउँसो ४ बजे अन्तिम नामावली प्रकाशन र शुक्रबार बिहान ९ बजेदेखि मतदान प्रक्रिया अघि बढ्ने जिल्ला निर्वाचन समितिका संयोजक ज्ञानेन्द्रप्रसाद अधिकारीले जानकारी दिनुभयो । यसपटक अधिवेशन उद्घाटन सत्र सामान्य रुपमा गर्न लागिएको छ । शुक्रबार बिहान मतदान अघि जिल्लामा उपलब्ध केन्द्रीय सदस्य र जिल्ला सभापति जीतनारायण श्रेष्ठले संयुक्त रुपमा अधिवेशनको समुद्घाटन गर्ने कार्यक्रम रहेको छ । त्यसलगत्तै अपरान्ह ५ बजेसम्म मतदान चल्ने छ । मतदान सकिएलगत्तै मतगणना गरिने निर्वाचन समितिले जनाएको छ ।

चितवन कांग्रेसको नयाँ नेतृत्वका लागि पाँच जना चुनावी मैदानमा छन् । बुधबार रातिसम्म सर्वसम्मत उम्मेदवार बन्न सकेको छ्रैन । संस्थापन अर्थात् सभापति शेरबहादुर देउवा पक्षबाट सभापतिको उम्मेदवार हालका वाग्मती प्रदेशका उद्योग तथा वाणिज्य मन्त्री मिलनबाबु श्रेष्ठ बन्ने निश्चित भएको छ भने संस्थापन इतरले साझा उम्मेद्वार चयन गर्न सकेको छैन । यसले गर्दा सभापतिको मतदान दोस्रो चरणमा जाने संभावना प्रवल बनेको छ ।

हालसम्म सभापतिका उम्मेदवार बन्ने तयारी गरेका विजय भुषालले उम्मेदवारीबाट पछि हटेका छन् भने अरु उम्मेदवारले आफ्नो अडानमै अडिग छन् । संस्थापनइतर समूहबाट हालका जिल्ला उपसभापति कैलाश कोइराला, सचिव उत्तम जोशी, राजेश्वर खनाल र डा.सूर्यकान्त घिमिरे चुनावी मैदानमा उत्रिने तयारीमा छन् ।


Like it? Share with your friends!